سائح صيني في حواري الرياض ( قصة من الخيال الافغاني )

[center]السلام عليكم ورحمة الله وبركاته

الخبر

فاز شاب الصيني وزوجته بتذكرتي سفر ذهاباً وإياباً إلى السعودية لقضاء شهر العسل.كان الجناح السعودي في معرض أكسبو شانغهاي 2010 قد استقبل الزائر رقم مليون وهو شاب صيني الذي تفاجأ باصطحابه من قبل مدير الجناح السعودي إلى المنصة حيث قدمت فرقة الفنون الشعبية عرضاً خاصاً لتهنئته. كانت جائزته ولزوجته عبارة عن تذكرتي سفر ذهاباً وإياباً إلى السعودية لرحلة مدتها أسبوع واحد يقضيها في ربوع السعودية. يعمل (الفائز) معلما للحاسب الآلي في مدرسةٍ متوسطةٍ وقال: "تزوجتُ منذ فترة قصيرة وسوف أقضي شهر العسل في السعودية".


القصة /




في احدى مقاطعات الصين الشماليه وتحديدا في اقليم سانق الجميل الهادي والذي تكسو جباله الاشجار وتتحلى مروجه بالخضره والورود وتحاوطه الانهار من كل ناحيه , في ذلك المكان الرايق والرومنسي , ولد بطل قصتنا السيد طخ شانغ في خريف عام 1985 تلك السنه التي تعتبر مميزه لهم حيث كثرت الضفادع والافاعي وانبسط الناس لانهم كذا ضمنوا انهم بيملون فريزر الزواحف هالسنه ( مثل فريزر التمر عاد حلها لو يكون عندهم ضميد ضفادع ) ولانهم يقدرون هالشغلات ويعتبرونها شي اساسي واكل شهي ومغذي ومفيد ولا يهون الدود والنمل والسحالي ( ايقونه صيني يشلوط له ضفدع على النار ) , منذ ان ولد هذا الابن وهو مثال للابن البار المطيع المهذب وذلك لانه اخذ جل اهتمام جده لامه السيد تن ون لي لكون طخ ولد يتيما فقد توفي ابوه بعد ولادته مباشره بعد ان سقط من فوق جبل بعد قتال شرس مع نمر كان يبغى يزبطه مفطح تمايم لولده طخ , بعدها اخذه جده و واراد ان يطلق عليه اسم فاحضر القوطي حق الاسامي ( هذا قوطي حليب فاضي يرمونه على نزله ويطلع اصوات وهو يخبط بالارض والصوت اللي يجوز لهم يحطونه اسم للولد.. شن بنق طنق ) وقبل ان يرمي جده القوطي قاله واحد من اهل القريه: وش له التعب سمه على اصوات ابوه يوم طاح من الجبل وترى اخر صوت سمعناها منه هو طخ فجاز الاسم له وسماه , وذبح في تمايمه خمس تماسيح وسبع ثعابين وزرافه



ومع بزوع الفجر ومداعبه اشعه الشمس للافق وتدفق نسمات الهواء العليله محمله باريج الزهور كان طخ يصحو من فراشه الذي كان مصنوع من القش حيث كان المنزل خشبيا ويتكون من اربع غرف فقط غرفه لجده وغرفه لامه وغرفته وغرفه المعيشه واللي فيها الكنب قصدي مكان الجلوس , وامام البيت ساحه صغيره فيها اشجار عملاقه تتزين بالزهور والفواكه , وبعد ان لبس طخ والذي لم يتجاوز عامه الرابع ونويفه صغيره ذهب لتناول فطوره مع جده ( بيض مع سحليه مسلوقه ) وبعدها ياخذ الدلو ويروح البير ويجيب مويه لهم , ويعبي لهم البرميل المخصص للماء والذي كان مصنوعا من الخشب , وبعدها يتوجه الى جده في الحقل خلف المنزل , وجده هذا له لحيه بيضاء ليست بالطويله ونحيل الجسم ومعه عصا عليضه كانها مركاز شبك ولا يتركها وين ما يكون , وفي الحقل يساعد طخ جده ما استطاع وحتى ما يروح تفكيركم بعيد وتقولون وش هاللي فالح من صغره فقد اختبره جده في كم شغله بس البثاره ما تخلي راعيها فكم من مره موسده بها , حتى في احد المرات كان طخ يحاول سحب ثعبان كبير في احدى جنبات الحقل وحاس ام المكان فجاه جده قافله معه وجلده هو والثعبان حتى ان الثعبان قافله معه وقعد يهاوش وانا وش دخلني هو اللي مطلعني , واخر شي لقى له جده شغله مفيده فصار يعلقه في خيال الموتى حتى يرعب الطيور لاقربت , وبعد ان كبر طخ شانغ ووصل الى سن السادسه ادخلته امه الى المدرسه وكلها امل ان فذة كبدها يفلح بشي اذا كبر , وان ماحصل فالله المستعان ماله الا يفتح مصنع قراشيع وقرابيع فاضيه ويصدر انتاجه لمحلات ابو ريالين في السعودية




بعد ان انتهت السنه الاولى من الدراسه ونجاح طخ وفي اول ايام العطله وتحديدا بعد ان اتم طخ افطاره قال له جده : شف وانا جدك الدراسه خلصت وابغاك تجي معي بروح انا واياك مشوار ناوي اوديك اليوم الى الشايب وانغ وابغاك تتكي عنده العطله ووتتعلم الكنق فو حتى تصير رجال عليك العلم مهوب شغل المياعه اللي طايحين فيه الشباب في شارع الثلاثين بوسط بكين , تلقاهم بشيعراتهم ومايعين وما مع الواحد منهم الا حزام اسود ولو تعطيه ثعبان حي حتى ياكله تقرف ( ميت مافيه مشكله ) جيل مافيه خير فاسد الله يقطعه !! , هز طخ رويسه وقال طيب جدي مافيه روحه الشرقيه ابي اركب دباب ( حتى هم عندهم شرقيه ) قال جده له : كل تراب و قم انهج لا اخلي هالعصا تواسيك , انفجر طخ بالبكاء وقال : مانيب مانيب ابغى سوني وابغى سيكل انا توي ناجح ترى اتعقد واترك المدرسه , فقال جده ماعليك هناك عنده كل شي حتى المراجيح والزحاليق قال طخ : مانيب مانيب ابغى انترنت قال جده : 4 ميقا ( وجه السدحان ) قال طخ : مانيب مانيب , وعندها هم جده باستخدام العصا ليهبدها على راسه فقام طخ مسرعا وودع وامه وقال لجده :يالله مشينا لا تتاخر , ذهب مع جده وسلكا طريقا وسط الغابه كان الطريق جميلا في بدايته وبعدها بدا يصير موحشا مخيفا لا تسمع فيه الا نعيق الغربان ولا ترى الشمس الا خلسه من بين الاغصان وكانه طريق مكتوب عليه للاشباح فقط







كان الطريق تاره يرتفع وتاره ينخفض , سأل طخ جده وهو طاقته النفاضه : جدي اللحين انت يومك توديني اتعلم كنق فو وراك انت ما تعلمت ؟ الا وش رايك وتراها موافقه تقعد معي ونتعلم سوى ترى مهيب شينه وفجاه هجم عليهم نمر ضخم فقفز جده قفزه خطيره وضرب النمر بالعصا واكمل عليه يضربه من كل جهه , وبكل قوه وطخ مندهشا مما جرى ,ومتفاجئ مما تراه عيناه ومن الجلد اللي شافه طخ جلس يتمسك ويسحب جده عن النمر ويقول له : طالبك هالمره سامحه سامحه والله ما يتعودها , وجده غير مكترث لتوسلاته والنمر مره يتفل دم ومره يقلد له قطوه يبي الفكه , حتى قضى عليه بعدها قام واقتلع قلب النمر ووضعه وسط منديل وحطه في مخباه وممدد النمر على شجرة قريبه ( ناويه لا رجع لثلاجه الزواحف ) , ومشى مكملا الطريق وطخ يلحقه ويقول : يا صديقي يا جدي انتظرني ياخي لاتسرع , واصل طخ شانغ وجده السير في هذا الطريق حتى وصلوا الى نهر كبير مياهه مائلة الى الخضره عندها التفت اليه جده وقال له : في هذا النهر ياوليدي مات الامبراطور وانق وجيشه الاسطوري على يد ساحر واحد حول الشجر الى وحوش وانقضت عليهم فلما دخلوا النهر هربا منهم اشتعل النهر ناراً فماتوا من الروعه وطخ يقول في نفسه : الله من ال***ط الفاضي , وفي الحقيقه كان طخ منشغلا عن ***بيط جده بمراقبه النهر والذي كانت تسبح داخله عدد من الثعابين الضخمه وعدد لا حد له من التماسيح ويقطعه جسر متهالك ينتهي بطريق جبلي صعد طخ وجده الى هذا الجسر المتهالك ومشوا بكل حذر متمسكين بحاجز الجسر والثعابين تزداد تحتهم والتماسيح رايحه جايه وتفتح فمها مستبشره وكانها تقول للثعابين : شباب من حضر القسمه فليقتسم , وكل ذلك على امل ان تظفر بواحد منهما






قطعا النهر وصعدا الجبل في طريق اوحش من الاول ولاحظ طخ انهما مقبلان على كوخ قديم وفيه اشجار كبيرة جدا ولها عروق ضخمه تحس ان الشجرة من كبرها لها لحيه , بدات السماء تغيم والمطر على وشك النزول ولم تكن القطرات الاولى تلامس خدودهم حتى كانا عند المنزل فاذا برجل شايب لحيته طويله وملابسه نظيفه ومرتبه بس تحس عمره صافط الميه , رمقه طخ بنظراته فضحك بينه وبين نفسه وقال : هذا وش له والتدريب شكله ملزق بشطرطون من كثر ما يطيح ويتكسر الظاهر اني بفلها وما حولي احد لو ازعجني دفيته وعقبها اجلس العب به واجمعه عاد كل شوي بغير بشكله مره احط يديه تحت ورجليه فوق ومره رجله بخشمه , قطع التخيلات صوت جده وتوسلاته ان يرضى هذا المدرب بتدريب حفيده والمدرب رافض ويقول : لا تحاول محد قادر من عيال هالجيل يتحملني لاتظن جيلنا مثلهم هذولي حدهم بودي ماستر ويخب , وبعد الحاح وافق على التدريب بشرط الطاعه فهز طخ راسه موافقا لانه حسبها وشافها على كيفه , وبعدها ودع جد طخ حفيده بعد ما وصاه وحرصه على ان يصير رجال ويخلي عنه الخنبقه , وبعد ان ابتعد جده عن المكان جاء طخ للشايب وقال له : يا شيبه وين السوني والدبابات براسي حره لعب ودي افلها .. كانت هذي اخر كلمات قالها طخ وهو طيب معافى لانه جاه كم ضربه طار وما وقع الا في الشجره اللي وراه واغمي عليه , وبعد مرور ساعات فتح طخ عيونه وليته ما فتحها فاذا هو مربط ومعلق بحبل تحت الجسر والثعابين والتماسيح تحته تقامز تبي تجيبه وهو يصايح والشايب جالس على الجسر بكل هدوء ومعه طرف الحبل وطخ يقول له : يالشايب العايب وخرني عنهم وش ذا هذا اللي وصاك جدي يا شرير فقال الشايب : اقول انا اسمي من اللحين الماستر فهمت فقال طخ : طيب خلاص يا ماستر شايب فكني , فارخى الحبل قليلا فصاح طخ وقال خلاص : يا ماستر اتوب اتوب , وبعد عدد من التهديدات والتعهدات خصوصا في موضوع السوني وال***بيط سحبه الى الجسر وطخ يكعها صيحه ويقول له: والله لا اعلم امي اوريك والماستر يرمي الحبل على رقبته ويعقده وطخ يقوم بسرعه ويصيح ويتوسل اليه ويقول له خلاص خلاص اللي تبيه يصير توبه توبه اقول شي وسوا له من الروعه باصبعه سيفين على حلقه

يسلمووو oonn